Қостанай — айрықша болмысы бар қала. Оның келбетінде өндірістік қуат, кең даланың еркін тынысы мен ұстамды эстетика тоғысқан. Қаланың осы ерекше сипаты бүгінде тұрғындар мен қонақтар үшін жаңа тартылыс орнына айналған CBRB кофе-зауытының тұжырымдамасына арқау болды.
Coffee Boom командасы Қостанайдағы жобаны әзірлеу барысында кезекті кофехана ашуды емес, қаланың тарихымен, болмысымен және адамдарымен үндесетін бірегей кеңістік құруды көздеді. Осы идея Қостанайдағы CBRB интерьерінен толық көрініс тапты: мұнда әр детальдың өзіндік мәні бар, ал кеңістіктегі барлық элемент біртұтас композиция құрап, кофе дәнінің өнер туындысына айналу тарихын баяндайды.
Қаланың
көк
коды
Жобаның басты түсі — көк. Оның таңдалуы кездейсоқ емес. Қостанай туынан алынған бұл реңктер қала тұрғындарына бала кезден таныс, қаланың келбетімен біте қайнасқан. Көк түс Лев Толстой атындағы облыстық кітапхананың кіреберісінен, драма театрының сәулетінен, орталық стадионның келбетінен де көрінеді. Осылайша ол қаланың әр тұсында қайталанып, Қостанайдың визуалды бейнесін қалыптастыратын айрықша белгіге айналған.
CBRB-де осы таныс түс жаңа сипатқа ие болып, қаланың мәдени кодын жалғастырады. Көк реңк жабдықтардың дизайнынан интерьер акценттеріне дейін үйлесім тауып, маңдайшалар мен жарықтандыру секілді ең ұсақ детальдардан да байқалады.
«Қонақ табалдырықтан аттаған сәтте-ақ бұл кеңістіктің өзіне жақын, өз қаласының болмысымен үндес екенін сезінсе екен дедік».
Шекарасыз кеңістік
CBRB KOSTANAY концепциясының негізінде қала келбетін қалыптастырған өндіріс пен ірі кәсіпорындар — «Алюр», «Баян Сұлу», «Арасан» тұр. Осы индустриялық болмыс жобаның басты идеясына айналып, кофехана кофе өндіретін ашық зауыт форматында жасалды. Бірақ оның маңызды ерекшелігі бар: мұнда қонақ пен өндіріс арасында ешқандай кедергі жоқ. «No boards» концепциясы кеңістіктің барынша ашық болуын көздейді: кофе қуыру, дәнді газсыздандыру, оны тасымалдау — бүкіл процесс қонақтардың көз алдында өтеді.
Әлемде кофе қуыру үдерісін дәл осындай ашық форматта көруге мүмкіндік беретін жобалар өте сирек. Тіпті ірі мегаполистердің өзінде қуыру аймағы көбіне әйнекпен бөлініп тұрады. Ал CBRB KOSTANAY Қостанайда бұл шекараны толығымен жойған алғашқы кофехана болды. Қонақтар ростерлерге жақындап, қуыру шеберлерінің жұмысын өз көзімен көріп, қызықтырған сұрақтарын қоя алады. Осы ашықтық арқылы кофе мен қонақтың арасында ерекше байланыс қалыптасып, әр шыныаяқтың артында тұрған шеберлік пен еңбек тереңірек сезіледі.
Жобаның жүрегі —
Weroast Roaster
Кофе қуыру аймағының ортасында фирмалық көк түстегі ростер орналасқан. Оның дизайнын Weroast Unique Design командасы осы жоба үшін арнайы әзірледі. Coffee Boom логотипінің бедері, жабдықтардың орналасуы мен түс шешімі желідегі басқа кеңістіктерде қайталанбайды. Сондықтан ростер мұнда жай ғана жабдық емес, CBRB KOSTANAY-дың басты акценті әрі жобаның идеясын айшықтайтын символ.
Оның жанында өндірістік цех стилінде безендірілген кофе дәнін газсыздандыру аймағы орналасқан. Қуырылғаннан кейін кофе тот баспайтын болаттан жасалған арнайы контейнерлерде тынығып, дәмі тұрақтанады. Әр контейнер нөмірленген, ал есеп жүйесі кофенің қанша уақыт тыныққанын бақылап отырады. Соның арқасында әр шыныаяқтағы кофенің дәмі таза болып шығады.
Бұл функционалды аймақтың өзі де арт-нысанға айналған: жарық панельдері, бренд атрибутикасы қойылған сөрелер оны кеңістіктің тұтас визуалды хикаясының бір бөлігіне айналдырады.
Қалықтаған кофе:
Weroast FLOW
Интерьердің ең әсерлі элементтерінің бірі — кофе дәнін құбырлар арқылы тасымалдайтын Weroast FLOW пневматикалық жүйесі. Бірінші қабатты бойлай өтетін төрт желі жаңа қуырылған дәнді қуыру аймағынан тікелей барға жеткізеді. Үш желі баристаға бағытталған, ал төртіншісі тұйық айналым жасап, дәнді кері қайтарады.
Барда өндірістік бункерлер пішінінде жасалған арнайы қабылдау силостары орналасқан. FLOW жүйесінің бір бөлігі саналатын бұл құрылғылар құбырмен келген жаңа қуырылған дәнді қабылдап, кофе дайындау үшін баристаға береді.
Дәм аймағы:
Weroast FROZ
CBRB KOSTANAY-да сирек әрі коллекциялық кофе лоттарына арналған Weroast FROZ мұздату жүйесі бар. Дегазациядан өткен дәндер кері клапаны бар шыны түтіктерге салынып, −20 °C температурада сақталады. Мұндай ортада дәндегі алмасу үдерістері 16 есе баяулап, кофе өзінің дәмі мен хош иісін бірнеше апта, тіпті айлар бойы сақтайды.
Осының арқасында қонақ ерекше лотты бүгін татып көріп, араға бір ай салып қайта оралғанда да сол дәмді сезіне алады. Әр сұрыпқа жеке сипаттама беріліп, арнайы түстік белгілеу жүйесі қарастырылған: көк — мұздатылған лоттарға, ақ пен сұр — эспрессоға арналған. Бұл жүйе қонаққа алуан түрлі кофе арасынан оңай бағдар тауып, қалаған лотын таңдауға көмектеседі.
Инсталляциялар мен арт-нысандар
CBRB KOSTANAY-дағы әр аймақтың өзіндік мәні бар: мұнда практикалық шешімдер өнермен үйлесіп, кеңістіктің біртұтас бейнесін қалыптастырады.
Кіреберісте қатар орналасқан екі тік конструкциядан тұратын инсталляция қонақтарды қарсы алады. Онда ағылшын және қазақ тілдерінде: «Біз specialty санатындағы кофе дәндерін ұқыптылықпен қуырамыз» деген жазу бар.
Бұл инсталляция CBRB тұжырымдамасының негізгі идеясын жеткізеді. Мұндағы specialty — SCA бағалауындағы кофе санаты ғана емес, дәнге деген ерекше көзқарас. Ол сапалы дәнді таңдаудан, әр лотқа сай қуыру профилін әзірлеуден және кофені түрлі әдіспен дайындаудан бастап, бүкіл үдерісті қонақтың көз алдында өткізуге дейінгі кезеңдерді қамтиды.
CBRB қонақты кофе мәдениетіне жақындатып, дәннің фермада өсуінен бастап, дайын сусынға айналғанға дейінгі жолын көрсетеді. Сондықтан кіреберістегі бұл жазу жай ғана сөз емес — кофеге деген ұқыптылық пен ашықтықты білдіретін CBRB ұстанымы.
«Кофе қуыру профилі» инсталляциясы ерекше назар аударады. Металл тақтайшалар мен жасылдан қою қоңыр түске дейін өзгеретін дәндер орналастырылған шеңберлер ростер ішінде жүретін процесті көрнекі түрде көрсетеді.
Бұл — әрі арт-нысан, әрі кофе дәнінің ростер барабанындағы жолын бейнелейтін инсталляция: жасыл дәнді салудан бастап, дайын кофені шығаруға дейінгі бүкіл кезең көз алдыңызда өтеді.
11 минут және 204 °C — CBRB жобасындағы лоттардың біріне арналған қуыру режимі. Ал көк түс жобаның фирмалық реңкімен үндеседі.
Бұл — ретро стильде жасалған жеке арт-нысан. Цифрлық экрандардың орнына команда қолмен ауыстыратын магнитті тақтайшалар орнатылған. Цифрлық технологиялар үстемдік еткен заманда мұндай шешім кеңістікке ерекше жылылық пен өзіндік атмосфера береді.
Қуырылған кофенің жалпы көлемі килограммен көрсетіліп, фирмалық көк түспен ерекшеленген. Өндіріс көлемі өскен сайын көрсеткіш те жаңарып отырады. Осылайша инсталляция өндірістің нақты ырғағын көрсетіп, онымен бірге өзгеріп отырады.
Жаңа қуырылған кофе аймағында қонақтарды «ROASTERS» жазуы бар жарық панелі қарсы алады. Бұл — әлемдік кофе мәдениетіне жасалған ишара. Жанындағы Weroast және CBRB логотиптері бейнеленген кендір қап жасыл кофе дәнінің плантациядан өндіріс орнына дейінгі жолын көрсетеді. Ал фирмалық көк түсті сөреден жаңа қуырылған кофені сол жерден сатып алуға болады.
Жобаның екінші қабатында суретші Бороншы Асан Серікқазыұлы қолмен безендірген V60 құйғыштарынан жасалған инсталляция орналасқан. Астанадағы CBRB жобасына да атсалысқан шебер бұл туындыда кофе мәдениеті мен қазақы нақышты шебер үйлестірген.
Әр құйғыштың өрнегі бірегей әрі қайталанбайды. Композиция төрт тақырыпқа құрылған: тау, шаңырақ, ұлттық ою-өрнек, сондай-ақ қозғалысты бейнелейтін күн мен жебе. Күн мен жебе уақыттың үздіксіз ағысын меңзейді. Құйғыштар осы төрт тақырып бойынша топтастырылып, суреттер бірінен соң бірі жалғасып отырады. Оларды қай бағыттан тамашаласаңыз да, тұтас композиция үздіксіз қозғалыс әсерін береді.
CBRB KOSTANAY кеңістігінде қонақтарды кофе географиясын таныстыратын тағы бір ерекше инсталляция қарсы алады. Минималистік индустриялық стильдегі панельдерде жасыл кофе дәндері жеткізілетін елдер — Кения, Бразилия, Перу және Руанда көрсетілген.
Әйнек астында әр өңірден әкелінген дәндердің үлгілері орналасқан. Қонақтар олардың қай елден келгенін көріп қана қоймай, түсін, көлемі мен сыртқы ерекшеліктерін салыстырып, әр өңірдің дәні бір-бірінен қалай ерекшеленетінін өз көзімен көре алады.
CBRB KOSTANAY — әр шыныаяқтың өз тарихы бар, ал қаланың кофе мәдениеті жаңа қырынан ашылатын кеңістік.
CBRB KOSTANAY — кофені барлық сезіммен танып-білуге мүмкіндік беретін кеңістік. Мұнда кофе жай ғана сусын емес, көруге, естуге және сезінуге болатын тұтас оқиғаға айналады. Вакуумдық контейнерлердегі жасыл дәннен бастап, құбырлармен барға жететін жаңа қуырылған кофеге дейінгі бүкіл үдеріс қонақтың көз алдында өтеді.
Мұнда индустриялық эстетика өнермен үндесіп, технология тек үдерісті жетілдіріп қана қоймай, қонаққа ерекше әсер сыйлайды.
