Астана — болашаққа батыл қадам басқан, қарқыны мен келбеті жаңа Қазақстанның символына айналған қала. Алайда заманауи елорданың тамыры терең тарихпен сабақтасып жатыр. Бұл өлке Ботай мәдениеті дәуірінен — адамзат жылқыны алғаш қолға үйреткен кезеңнен сыр шертеді. Ғасырлар қойнауындағы тарих пен бүгінгі қаланың екпінді ырғағы арасындағы осы үндестік CBRB ASTANA жобасының басты идеясына айналды. Мұнда өткен мен бүгін сабақтасып, кофе дәуірлер арасын жалғайтын көпірге айналады.
Coffee Boom командасы елордадағы жобаны әзірлеу барысында Астананың осы болмысын — тарихқа құрмет пен болашаққа ұмтылысты бір кеңістікте үйлестіруді көздеді. Нәтижесінде көне дәстүрлердің ізі мен заманауи кофе өндірісі үйлесім тапқан ерекше интерьер дүниеге келді.
Күйдірілген топырақ
Жобаның басты түсі — терракота. Оның таңдалуының өзіндік мәні бар. Итальян тіліндегі «terra cotta» сөзі «күйдірілген топырақ» деген мағынаны білдіреді. Шамамен тоғыз мың жыл бұрын адамдар сазды пеште күйдіруді меңгерді. Оттың әсерінен жұмсақ саз берік материалға айналып, адамзат тарихындағы алғашқы химиялық төңкерістердің біріне жол ашты.
CBRB ASTANA-дағы терракота — ежелгі қыш шеберлеріне тағзым. Қымыз ашытуға арналған жебе ыдысы кезінде баспаналардағы арнайы қуыстарда сақталған. Өзен жағасындағы қыш күйдіретін орындар мал қораларына жақын орналасқан, ал жылқы Ботай мәдениеті мен тұрмысының ажырамас бөлігі болған. Осылайша қыш өнері мен жылқы шаруашылығы өзара сабақтаса дамыды.
Терракота осы көне өнердің бояуын бүгінгі кофе мәдениетімен байланыстырады: оның жылы реңкі қуырылған кофе дәнінің түсімен үндеседі. Осы түсте тарих пен бүгін, көне қолөнер мен заманауи CBRB мәдениеті тоғысады.
Жобаның фирмалық түсі
Инсталляциялар
және арт-нысандар
Бірінші қабаттың басты инсталляциясы — жартас суреттерінен шабыт алған, терракота түсті күйдірілген саз тақташалардан құрастырылған қабырға панносы. Онда Ботай мәдениетінің тарихы — жылқыны қолға үйрету, ежелгі адамдардың тұрмыс-тіршілігі мен баспаналары бейнеленген.
Панноның төменгі жағындағы қазақ және орыс тілдеріндегі тақта жобаның осы өңірде жылқы алғаш қолға үйретілген б.з.д. IV мыңжылдыққа және XIX ғасырда бой көтерген Ақмола қаласына арналғанын баяндайды.
Саздан жасалған әр бөлшек суретші Асан Бороншының қолынан шыққан және ешқайсысы қайталанбайды. Инсталляцияны тірі ағаш отырғызылған керамикалық ыдыс толықтырады. Оның бетіндегі бейнелер көне дала өмірін суреттеп, ортақ тақырыпты жалғастырады.
Инсталляция үлкен ортақ үстел арқылы бір-бірімен байланысқан екі бөліктен тұрады. Оның екінші бөлігі — тірі ағаш жайқалған керамикалық ыдыс. Ежелгі шеберлердің өнерінен шабыт алған ыдыстың өн бойын жартас суреттерін еске түсіретін бейнелер көмкерген. Шеңбер бойымен өрілген бұл көріністер ботайлықтардың тіршілігін бейнелеп, көне дала тарихын бүгінгі кеңістікке жалғайды.
Үлкен ортақ үстелдің жанындағы инсталляция кофенің қуырылу жолын көрнекі түрде таныстырады. Үш мөлдір түтікке жасыл дәннен бастап ең қою реңкке дейінгі қуырудың әр кезеңіндегі дәндер салынған. Жанындағы металл пластинада қуыру профилі көрсетіліп, үдерістің әр минутындағы температура белгіленген. Бұл — жобаның тұрақты эспрессо лотына арналған фирмалық профиль.
Инсталляцияның екінші бөлігі жобада қолданылатын төрт кофе сұрыбын таныстырады: Бразилия Серрадо, Эфиопия Сидамо, Танзания Рукума және Бурунди Муйинга. Мөлдір түтіктер арқылы қонақтар әртүрлі селекциялар мен сұрыптарға жататын кофе дәндерінің түсі, көлемі және қуырылу деңгейі жағынан бір-бірінен қалай ерекшеленетінін анық көре алады. Осылайша инсталляция жай ғана интерьер бөлшегі емес, кофе әлемін танытатын жанды әрі танымдық экспозицияға айналады.
1974 жыл кофе тарихындағы ерекше кезең болды. Дәл осы жылы «Specialty Coffee» ұғымы алғаш рет пайда болды. Оны америкалық Knutsen Coffee компаниясының иесі Эрна Натсен енгізді. Tea & Coffee Trade Journal журналында ол бұл атауды сапасы жоғары, өзіндік дәмі айқын шағын партиядағы кофе дәндеріне қатысты алғаш рет қолданды.
Бұл ұғымның астарында кофенің жай ғана саудаға түсетін өнім емес екендігін меңзейтін қарапайым ой жатыр. Қолайлы табиғи ортада өсіп, мұқият жиналып, ұқыппен өңделген дәннің өзіне ғана тән дәмі болады. Осындай айрықша кофені Эрна Натсен specialty — «ерекше кофе» деп атауды ұсынды.
Арада жарты ғасырдан астам уақыт өтсе де, бұл ұғымның мәні өзгерген жоқ. Specialty Coffee — шығу тегі белгілі, сапасы дәлелденген, өз тарихы бар кофе. Оның құндылығы бағасында емес, әр дәннің тарихында. Оның қай жерде, қалай өсірілгені, кімнің қолымен жиналғаны және ерекше дәмінің қалай қалыптасқаны жайында білесіз.
Бұл — кофені өсірген фермердің еңбегін, жердің ерекшелігін және дәннің плантациядан шыныаяққа дейінгі бүкіл жолын бағалау мәдениеті.
Roasters (немесе Roastery) — әлемдік кофе мәдениетінде қалыптасқан кәсіби ұғым. Бұл атау кофені тек дайындап қана қоймай, дәнді өздері қуыратын жобаларға тән. Мұнда қуыру — жай ғана өндірістік процесс емес, кофенің дәмі мен болмысын айқындайтын басты құндылық.
CBRB-дің ерекшелігі — ростердің бөлек өндіріс орнында емес, кофехананың ішінде болуы. Қонақтар дәннің қалай қуырылатынын өз көзімен көре алады. Әлемде мұндай форматтағы жобалар санаулы.
CBRB — Coffee Boom Roasters & Bakery атауының қысқартылған нұсқасы. Мұндағы Roasters әр CBRB жобасының өз ростері бар екенін білдіреді. Сондықтан кіреберістегі «Астана Roasters» жазуының мәні қарапайым: ол кофе дәл осы жерде қуырылып, осы жерден шыныаяққа жол тартады дегенді білдіреді.
Бірінші қабатта CBRB әріптері мен «Ең үздік кофені таңдаймыз» жазуының жанында телефон экранындағы қосу/өшіру белгісін еске түсіретін үш үлкен тетік бар. Төменгі екеуі қуырылған кофе дәндерімен, ал оң жақтағысы жасыл дәндермен толтырылған.
Бұл арт-инсталляция кофе әлемі мен күнделікті цифрлық әдеттерді тоғыстырады. Күн сайын экраннан көріп, сан рет басатын таныс белгі мұнда жаңа сипатқа ие болған: көлемі үлкейіп, ішіне нағыз кофе дәндері салынып, ерекше арт-нысанға айналған.
Екінші қабатқа апаратын баспалдақ жанындағы инсталляция кофенің дәміне табиғи орта мен биіктіктің қалай әсер ететінін таныстырады. Мұндағы басты ұғым — терруар. Бұл белгілі бір аймаққа ғана тән климат, топырақ, биіктік пен табиғи жағдайлардың үйлесімі. Инсталляцияда кофе өсіретін нақты фермалар мен шаруашылықтар төменнен биікке қарай реттеліп, әрқайсысының елі мен теңіз деңгейінен орташа биіктігі көрсетілген.
Биіктеген сайын климат салқындап, күн мен түн температурасының айырмасы ұлғаяды. Соның әсерінен кофе жемісі баяу пісіп, дәні тығыздала түседі әрі қант пен органикалық қышқылдарды көбірек жинайды. Дәл осы үдеріс кофенің дәмін күрделендіріп, хош иісін аша түседі.
1500-2000 метрден жоғары өскен кофеде гүлдің нәзік хош иісі, жидек пен жемістің жарқын реңктері жиі байқалады. Сондықтан биіктік — картадағы жай ғана сан емес, ол — әр дәннің дәмі мен хош иісіне табиғат қалдырған өзіндік қолтаңба.
Инсталляция Ботай мәдениетінің басты символы — жылқы бейнесіне арналған. Ежелгі Ботай қоныстарында жылқы күнделікті тіршіліктің өзегіне айналып, оның жанында қыш жасау өнері де қатар дамыған.
Қабырғада жылқы үйірі емес, бір жылқының қозғалыс үстіндегі түрлі сәті бейнеленген: тыныш тұрған қалпынан бастап құйғыта шапқан кезіне дейін. Қозғалыс біртіндеп үдей түсіп, еркіндік пен уақыттың, өткеннен бүгінге жалғасқан жолдың бейнесіне айналады. Жылқы қабырға бойымен алға ұмтылып, ғасырлар арасын жалғап бара жатқандай.
Композиция көне дәстүр мен бүгінгі технологияны бір арнаға тоғыстырады. Керамикалық табақтағы қолмен салынған сурет ежелгі шеберлердің қолтаңбасын жаңғыртса, металл шеңбердегі лазермен салынған бедер оған заманауи сипат береді.
Бұл — жылқы бейнесі арқылы адам мен табиғаттың байланысын, даладағы тіршілік пен ұрпақтан ұрпаққа жалғасқан мұраны баяндайтын инсталляция. Мұнда өткен тарих болып қана қалмай, бүгінмен бірге қозғалысын жалғастырады.
Төбеде кофе дәндеріне толы төрт аспалы панель қалықтап тұр. Бір қарағанда дәндер жерге құламай, дәл төбеңізде ауада қатып қалғандай әсер береді. Жер мен көктің арасында, салмақ пен жеңілдіктің шекарасында қозғалыс бір сәтке тоқтағандай.
Бұл — гравитацияға бағынып тұрып, оған қарсы шыққан инсталляция. Дәндер төмен құламай, ауада қалықтап қалғандай. Бұл тосын көрініс еріксіз жоғары қаратып, бір сәт аялдауға шақырады.
Мұнда салмақ пен жеңілдік, тыныштық пен қозғалыс тоғысады. Ал кофе дәндері кеңістіктің бір бөлшегінен өнер нысанына айналады.
Бұл инсталляция кофе дайындаудың ең көне дәстүрлерінің бірі — құмда дайындау тәсілін таныстырады. Композицияның өзегінде әр дәуір мен халықтың кофе мәдениетінен сыр шертетін үш тарихи ыдыс бар: ибрик, джезва және далла. Үшеуі де жеке тұғырға қойылып, әрқайсысының тарихы мен ерекшелігі жанындағы паннода қазақ және орыс тілдерінде баяндалған.
Композиция екі кеңістікті өзара байланыстырады. Бір жағында — тарихтан жеткен нақты ыдыстар, екінші жағында — суретші Бороншы Асан Серікқазыұлының майлы бояумен салған туындысы. Туындыда тұғырда тұрған джезва бейнеленіп, көне бұйым кескіндеме арқылы жаңа қырынан ашылады.
Осылайша бір ғана джезва екі бейнеде көрініс табады: бірі — тарихтың нақты ізі, екіншісі — оның өнердегі жалғасы. Өткен мен бүгін, көне қолөнер мен заманауи кескіндеме бір-біріне үн қатып, тұтас тарихқа айналады.
Инсталляция ғасырлар бойы кофе дайындау тәсілін өзгерткен өнертабыстар тарихына арналған. Композицияда дөңгелек панельдер, саз, металл және көркем сурет үйлесім тауып, әр материал өз дәуірінің сипатын жеткізеді. Қабырғада алғашқы қарапайым қол құралдарынан бастап күрделі механизмдерге дейінгі кофе құрылғыларының бейнелері жинақталған.
Мұнда кофе мәдениетінің қалыптасуына жол ашқан маңызды өнертабыстар топтастырылған. Дөңгелек панельдер әр құрылғының қашан және қай жерде пайда болғанын, сондай-ақ атауының шығу төркінін таныстырады.
Бұл инсталляция кофе мәдениетінің қалыптасуында дәммен қатар шеберлік, инженерлік ізденіс пен жаңашылдықтың да маңызды рөл атқарғанын көрсетеді.
Бар аймағындағы екі инсталляция CBRB ASTANA-ның екінші қабатына ерекше атмосфера сыйлайды. Мұнда кофе мен сапалы музыка бір кеңістікте тоғысады.
Біріншісі — дыбыс жазу студияларынан таныс «ON AIR» белгісі. Жазба басталғанда жанатын бұл белгі студиялық таза дыбысты, шығармашылық еркіндік пен музыканың дәл сол сәтте дүниеге келуін бейнелейді.
Екіншісі — винил ойнатқышы бейнеленген картина. Ол баламалы дыбыстың жылы әрі табиғи үнін еске салып, кеңістікке ерекше жайлылық сыйлайды. Жанындағы винил күйтабақтары сақталған шкаф композицияны толықтырып, музыканы тек естілетін дыбыс емес, қолмен ұстап, сезінуге болатын әлем ретінде танытады.
Осы детальдар екінші қабатты кофе мен сапалы дыбыс тоғысқан ерекше кеңістікке айналдырады. Мұнда цифрлық өңдеуге ұшырамаған, табиғи әрі жанды үнге мән беріледі. Кофе ішіп қана қоймай, музыканы әлемнің үздік студияларындағыдай таза әрі шынайы қалпында тыңдауға болады.
CBRB ASTANA-дағы бұл инсталляция винил күйтабақ пен specialty coffee философиясын тоғыстырады. Оларды тоғыстыратын басты идея — әр детальға ерекше мән беру. Композиция осы идеяны ашатын үш элементтен тұрады.
Біріншісі — металл жиектемедегі картина. Онда винил күйтабақты ұстап тұрған қол бейнеленген. Күйтабақ бетіндегі әр жолақты суретші циркульмен қолмен сызған. Аса дәлдік пен төзімділікті қажет ететін бұл нәзік жұмыс шеберліктің, зейін мен ұқыптылықтың көрінісіне айналған.
Екінші элемент — әйнек астындағы кілем. Дәстүрлі тоқыма өнеріне үндес бұл бөлшек композицияға жылылық пен тереңдік береді. Үшіншісі — суретші Асанның ою-өрнек салынған картинасы. Ондағы өрнектер кілемдегі нақыштармен сабақтасып, үш туындыны ортақ идеяға біріктіреді.
Бұл үш элемент бір ойды жеткізеді: кофеге қойылатын жоғары талап өнерде де жалғасады. Әр сызық, әр түйін, әр қылқалам ізі уақытты, ұқыптылық пен шеберлікті қажет етеді. Specialty философиясы да осыдан басталады — дәннің сапасын бағалаудан ғана емес, әр пішінге, әр дыбысқа, әр бөлшекке мән беруден.
Әр CBRB жобасында кендір қаптың өзіндік тарихы бар. Бұл жай ғана декорация емес — плантациядан шыққан кофе мыңдаған шақырымды артқа тастап, CBRB-ге дәл осы қаппен жеткен.
Алдарыңыздағы 30 келілік қап Эфиопиядан келген Specialty лотына тиесілі. Оның бетіне Weroast және CBRB логотиптері бедерленіп, қолмен сурет салынған.
Жасыл дән арнайы аймақта вакуумда сақталса, бұл қап тұғырда бастапқы қалпында тұр — теңіз контейнерінен жаңа ғана түсірілгендей. Оған қарап қана қоймай, қолмен ұстап көруге болады. Осылайша кофенің плантациядан басталып, мұхит асып, CBRB-ге дейін жеткен жолын жақыннан сезінесіз. Мұнда фильтр-кофе дайындауға қолданылатын Specialty лоты CBRB-ге шынымен дәл осы қаппен жеткізілген.
Бұл кендір қап — кофенің плантациядан шыныаяққа дейінгі ұзақ жолының бір бөлшегі. Ол алыстағы Эфиопия мен CBRB арасын жалғап, әр дәннің өскен жері, жүріп өткен жолы мен өзіндік тарихы бар екенін көрсетеді.
Кофе қуыратын кеңістіктің үстінен шаңырақтың пішінін қайталайтын құрылым көрінеді. Ғасырлар бойы шаңырақ қазақ үшін жай ғана киіз үйдің бір бөлігі емес, отбасы мен әулеттің бірлігін, үйдің жылуы мен берекесін білдіретін символға айналған. Бір шаңырақ астында бас қосу — жақындық пен қонақжайлықтың белгісі.
CBRB-де бұл көне символ жаңа кеңістікте жаңаша сипат алған. Металдан жасалған этникалық әшекейлермен көмкерілген шаңырақ жобаның жүрегі — кофе қуырылатын орынның үстінде қалықтап тұр.
Мұның астарында қонақтың орны — төрде деген қазақы танымға жақын қарапайым ой жатыр. Сондықтан CBRB-де әр қонақты үйге келген қадірлі адамдай қарсы алады. Ал шаңырақ астында қуырылған кофе — әр шыныаяққа сіңген жылу, ықылас пен шеберліктің көрінісі.
Шексіз ашықтық
CBRB ASTANA концепциясының негізінде эклектика — көне тарих, ұлттық мұра мен заманауи технологияны бір кеңістікте тоғыстыру идеясы жатыр. Астана — болашаққа ұмтылған заманауи елорда, сонымен бірге терең тарихтың ізі қалған мекен. Осы далада біздің дәуірімізге дейінгі IV мыңжылдықта Ботай мәдениеті қалыптасып, адамзат пен жылқы арасындағы жаңа дәуір басталды.
Осы өткен мен бүгіннің сабақтастығы CBRB ASTANA болмысын айқындайды. Кофехана кофе өндірісін қонаққа барынша жақындататын ашық фабрика ретінде жасалған. Мұнда үдеріс қабырғаның ар жағында қалмайды — әр кезең кеңістіктің бір бөлігіне айналған. «No boards» концепциясы да осы еркіндік пен ашықтыққа негізделген: дәннің қуырылуы, газсыздандырудан өтуі мен тасымалдануының бәрі қонақтардың көз алдында өтеді.
Мұндай ашықтық әлемнің кофе мәдениетінде сирек кездеседі. Тіпті ірі қалаларда қуыру аймағы көбіне әйнекпен немесе қабырғамен бөлініп тұрады. CBRB ASTANA-да ростерлер кеңістіктің дәл ортасында орналасқан. Қонақ дәннің қалай өзгеретінін жақыннан бақылап, кәсіби маманға кофе туралы сұрағын қоя алады. Осылайша қонақ кофенің әр кезеңін жақыннан танып, оның қалай пайда болатынын өз көзімен көреді. Ал интерьерде көне дала тарихы жаңғырып, бұл мекеннің тамыры тереңде жатқанын сезіндіреді.
WEROAST ROASTER
Ростер — CBRB ASTANA-дағы қуыру аймағының жүрегі әрі бүкіл жобаның басты акценттерінің бірі. Ол кеңістіктің айрықша белгісіне айналған фирмалық терракота түсінде жасалған. Корпусына CBRB логотипі мен Астана өңірінің коды ойып жазылған.
Weroast Model R 4.2 дизайнын Weroast Unique Design командасы CBRB ASTANA үшін арнайы әзірледі. Түс палитрасы, бедердің орналасуы мен орындалу тәсілі, әр реңк пен деталь — осы жобаға ғана тән. Мұндай үйлесім басқа CBRB кеңістіктерінде қайталанбайды.
Сондықтан ростер мұнда тек кофе қуыратын жабдық емес. Ол технология мен дизайнды тоғыстырған басты арт-нысанға айналып, қонақтың назарын бірден өзіне аударады. Терракота реңкі мен бірегей бедері CBRB ASTANA-ның дара болмысын айқындап, бұл кеңістіктің тек осы қала үшін жасалғанын аңғартады.
WEROAST FLOW
WEROAST FLOW — өнеркәсіптік жабдық үлгісінде жасалған пневматикалық жүйе. Бірінші қабатты бойлай өтетін төрт тасымалдау желісінің үшеуі барға бағытталса, төртіншісі дәнді кері қайтарады. Осылайша кофені тасымалдаудың күнделікті үдерісі қонақтың көз алдында әсерлі көрініске айналады.
Weroast Unique Design әзірлеген FLOW екі міндетті қатар атқарады: қуыру аймағынан кофе дәндерін барға жеткізетін функционалды жүйе әрі кеңістіктің ажырамас бөлігіне айналған арт-нысан. Мөлдір үдеріс арқылы қонақ дәннің құбырлар бойымен қозғалысын өз көзімен көре алады.
Бардағы қабылдау силостары — FLOW жүйесінің жалғасы. Өнеркәсіптік бункерлер пішінінде жасалған олар құбырлардан келген дәнді қабылдап, әрі қарай баристаға жеткізеді. Бүкіл жүйе секілді, силостарда да қызмет пен эстетика үйлесім тауып, кофе дәнінің қозғалысын CBRB кеңістігіндегі ашық үдерістің бір бөлігіне айналдырады.
WEROAST FROZ
CBRB ASTANA-да V60 үшін арнайы мұздатылған кофе қолданылады. Оны сақтауға арналған WEROAST FROZ камераларын Weroast Unique Design командасы CBRB желісі үшін арнайы әзірлеген. Бұл бірегей жүйеде мұздатқыш камера, лоттар туралы ақпарат беретін карточкалар, арнайы бедерлер мен әр кофеге әзірленген жеке қуыру профильдері өзара үйлесім тапқан.
Әр лотқа терракота гаммасындағы арнайы тақтайшалар арналған. Түстер кофенің мақсатын бірден ажыратуға мүмкіндік береді: ақ және сұр — эспрессоға, терракота — мұздатылған V60 лоттарына арналған.
Газсыздандырудан кейін кофе біржақты клапаны бар шыны түтіктерге жеке порциямен салынып, −20 °C температурада мұздатылады. Суық дәннің ескіруін 16 есе баяулатып, оның дәмі мен хош иісін ұзақ уақыт бойы бастапқы қалпында сақтауға көмектеседі. Осылайша әр V60 лоты қуырылғаннан кейінгі жарқын дәмін барынша ұзақ сақтайды.
Кофе дәнін газсыздандыру аймағы
CBRB ASTANA-дағы газсыздандыру аймағы — кофе қуырылғаннан кейінгі маңызды кезең. Мұнда жаңа қуырылған дән тынығып, біртіндеп тұрақтанады, дәмі мен хош иісі толық ашылып, келесі кезеңге дайындалады.
Кеңістіктің басты акценті — жоба ашылған күннен бері қуырылған кофенің жалпы көлемін көрсететін электронды есептегіш. Ондағы әр сан CBRB ASTANA-ның жұмыс ырғағын көрсетіп, қуырылған кофе көлемін үздіксіз тіркеп отырады.
Ростерден шыққан дән жеке нөмірленген Weroast фирмалық тот баспайтын болат контейнерлерге салынады. Арнайы жүйе әр контейнерде қандай лот сақталғанын және оның газсыздандыру уақытын бақылап отырады. Кофенің сұрыбы мен қуыру профиліне қарай бұл үдеріс бірнеше сағаттан бір тәулікке дейін созылады.
Газсыздандыру аяқталған соң дән қаптауға немесе баристаға жіберіледі. Осылайша әр лот қуырудан бастап шыныаяққа жеткенге дейінгі бүкіл жолдан нақты бақылаумен өтеді.
Кофе дәнін сақтау аймағы
Бұл — жасыл кофе дәндерін вакуумда сақтайтын арнайы аймақ. Вакуум қаптама дәннің табиғи дәмі мен хош иісін сақтап, тотығудан және сыртқы ортаның әсерінен қорғайды. Соның арқасында жасыл кофе сапасын жоғалтпай, ұзақ уақыт сақталады.
CBRB ASTANA жобасы үшін мұнда жасыл кофе туралы арнайы ақпараттық тақтайшалар әзірленген. Оларда әр кофенің сұрыбы, шыққан жері мен негізгі ерекшеліктері қазақ және орыс тілдерінде көрсетілген.
Жанында қуырылған кофе дәндерін сақтау аймағы бар. Дәндер газсыздандыруға арналған клапаны бар арнайы қаптамаларға салынады. Клапан қуырылғаннан кейін бөлінетін газдың сыртқа шығуына мүмкіндік беріп, кофенің балғындығы мен хош иісін сақтауға көмектеседі.
Кеңістіктің ашық форматы қонақтарға кофе дәнінің бүкіл жолын — жасыл күйінен қуырылып, шыныаяққа жетуге дайын болған сәтіне дейін көзбен көруге мүмкіндік береді.
Өткен мен бүгін бір шыныаяқта көрініс табады
CBRB ASTANA — мыңжылдық тарих пен бүгінгі технология бір кеңістікте тоғысқан жоба. Мұнда өткеннің ізі интерьердің әр бөлшегінен көрініс тауып, заманауи шешімдер кофе дәнінің плантациядан шыныаяққа дейінгі жолын көз алдыңызда ашады. Ботай мәдениеті specialty coffee әлемімен үндесіп, көне қыш өнері дәнді тасымалдайтын пневматикалық жүйелермен сабақтасады.
Мұндағы әр инсталляция, әр түс, әр ыдыс пен әр деталь тұтас тарихтың бір бөлігіне айналған. Бұл кеңістік кофені жай ғана ішіп кетуге емес, оның қайдан келгенін, қалай өңделіп, қалай қуырылатынын жақыннан танып, бүкіл үдерісті өз көзіңізбен көруге шақырады.
CBRB ASTANA-да өткен мен бүгін қатар өмір сүреді, ал олардың тарихы әр шыныаяқ кофеде жалғасын табады.
